Lok Sabha inthlan awm tur hi BJP leh Congress indona a ni - INC Candidate

Lok Sabha inthlanpui awm tura Indian National Congress (INC) candidate Lalbiakzama chuan, Lok Sabha inthlan awm tur chu BJP leh Congress party indona niin a sawi.

Lalbiakzama hian nimin khan Siaha Bazara vantlang inkhawmah thu a sawi a, "Lok Sabha inthlan awm tur hi MNF leh ZPM-te nena inbeihna a ni lo. Kristiante nêkchêpa tihboral tumtu BJP leh sakhaw zalenna humhalhtu Congress party-te indona a ni," a ti.

BJP chêt dan a râwvâ tulh tulh nia sawiin Lalbiakzama chuan, "Nikum chhung ringawt pawhin India ram hmun hrang hrangah Kristiante tihduhdahna vawi 648 a thleng," a ti a; Manipur-ah biak-in tam tak tihchhiat a nih a, mi tam tak an thi chunga Prime Minister-in a tlawh lo chu Kristiante thamlohna a nih thu a sawi.

INC Candidate chuan, India rama zirna-in hrang hranga principal leh dean ni turin thiamna mai bakah RSS chhuak nih a ngai tawh nia sawiin, "RSS-te chuan India hi Hindu mite chenna tur a nih thu inzirtirin, hnam tlem zawk leh sakhaw tlem zawkte chungah hleihluak takin chêt an thawh zel. Râwvâ tak taka Kristiante sawisa a, rawktute lakah FIR chu thehlut ve mahse jail an táng thei lo. A lehlingin Kristiante'n min bum tiin pawisate an chawitir zawk a ni," a ti.

India ram ril zawka Kristian missionary-te enthlak reng an nih thu sawiin Lalbiakzama chuan, "Kan Lalpa chanchin ṭha hril hi BJP sorkar hnuaiah a harsa hle tawh. Assam-a BJP sorkar phei chuan tihdam rawngbawl hna thawh phal loin Assembly House-ah dan an pass a ni," a ti a; nasa zawka Kristiante tana harsatna siam turin hma an la zel niin a sawi.