Hmasawnna inlaláwn fuh turin Ruling party MP a fuh ka ring - Richard Lalhmangaiha

ZPM, Mamit Central Block chuan nimin khan Lok Sabha inthlan tur pualin Siamliana Hall, Mamitah vantlang inkhawm an buatsaih a; ZPM MP candidate Richard Lalhmangaiha chuan, hmasawnna inlaláwn chho fuh turin ruling party MP a fuh hlea a rin thu a sawi.

Richard Vanlalhmangaiha chuan, MP candidate paruk zingah fel ber a inti ngam lo tih sawiin, "Mi dang pawh ṭha tak tak an awm tih ka hria. Chutih rualin, ruling candidate ka nih avangin thlan tlin ka nih chuan kan state sorkar tan ka chhawrnaawm berin ka ring," a ti.

Mizo mipuite'n duh takin ZPM sorkarna an pek thu sawiin Richard-a chuan, "ZPM thâ tichak turin MP atan pawh ruling party mi ngei MP atan thlan nachang kan hriat phawt chuan hmasawnna a inlaláwn chho fuh hlein ka ring," a ti a, ZPM party chu mipuite'n enchhin mai mai atana an thlan chhuah a ni loa a hriat thu a sawi.

Richard Vanlalhmangaiha chuan, Mizoram siamṭha a, raltiang ram kaipui tur leh state dang tan pawha entawn tlak sorkar kalphung thar hmuh beiseiin ZPM chu lalṭhutthleng pek a ni tih sawiin, "Mipui beisei anga kan kal theih nan kumin MP inthlanah hian ruling party ngei aṭanga MP nei turin mipui i inbuatsaih ang u," a ti.

ZPM MP Candidate chuan, MP inthlan chu MLA inthlan aiin mipuiin an ngaihven lo deuha a lan theih thu a sawi a; tun ṭuma MP inthlanah erawh chuan a tam thei ang berin vote an thlak theih nan theihtawp chhuah turin mipui a sáwm a ni.