Art Workshop & Exhibition buatsaih

Systematic Voters Education & Electoral participation (SVEEP), Aizawl district chuan Lok Sabha inthlanpui awm turah vote thlâk tura mipui zirtirna atan nimin khan Millennium Centre chhuat záwl (atrium)-ah Art Workshop & Exhibition an buatsaih.

Art Workshop & Exhibition hi Aizawl district SVEEP leh Aizawl Art Gallery & School of Fine Arts ṭang dun buatsaih niin, Aizawl district election officer Nazuk Kumar, bawrhsapin a hawng. April 3-5, 2024 chhung buatsaih a ni dawn a, lemziak thiam mi eng emaw zat an tel.

Nazuk Kumar chuan, Mizorama MLA inthlanah vote a tlak ṭhat viau ṭhin laiin, Lok Sabha inthlanah vote tla a ṭha tâwk lo ṭhin tih sawiin, MP inthlanah vote thlak ngaih pawimawh a ṭul thu a sawi a; Mizoram MP tur thlanna April 19, 2024-a neih turah vote thlak ṭheuh turin mipui a sáwm.

SVEEP nodal officer C Laltleipuii'n inthlanpui pawimawhna leh Art Workshop & Exhibition buatsaih chhan a sawi a; Aizawl Art Gallery & School of Fine Arts neitu Lalṭanpuia'n thu a sawi bawk.