North East NSS Festival hman mek a ni

National Service Scheme (NSS) Regional Directorate, Guwahati leh Mizoram State NSS Cell chuan April 2, Thawhlehni aṭang khan Berawtlanga Art & Culture Complex-ah North East NSS Festival an buatsaih a, nimin khan Mizoram University vice chancellor Prof. Dibakar Chandra Deka-a'n a hawng.

North East NSS Festival hi April 6, 2024 thleng awh tur a ni a, hmarchhak state pariat - Mizoram, Arunachal Pradesh, Assam, Manipur, Meghalaya, Nagaland, Sikkim leh Tripura aṭangin NSS volunteer mi 280 leh programme officer 20 vel an tel.

Nimina NE NSS Festival hawnnaah hian khuallian Prof. Dibakar Chandra Deka-a'n thu a sawi bakah, NSS regional director Jangjilong, Mizoram State NSS officer F Sangvuana ten thu an sawi a; NSS volunteer hrang hrangte’n an hnam lâm leh theihna hrang hrang an entir.

NSS Festival chhungin thupui hrang hrang hmanga inzirtirna hun te, cultural programme te, sightseeing leh social work tihna hunte an hmang dawn a ni.

Tun dinhmunah Mizoramah university leh college-ah 29-ah NSS unit din a ni tawh a, higher secondary school 71-ah NSS unit din a ni tawh bawk a; Mizoramah NSS volunteer 30,100 an awm mek a ni.