Election observer-te'n Saitual an tlawh

Mizoram Lok Sabha inthlan tura expenditure observer Arvind Sharma leh Anita Rinesh bakah, police observer K Satyanarayana te chuan April 2, Thawhlehni khan Saitual an tlawh a, Saituala election official-te DC Conference Hall-ah thil pawimawhte an sawipui.

Ṭhutkhawm hi Saitual district election officer Dr Lalngura Tlau-in a kaihruai a, Saitual district-a election lam buaipuitu officer-te an tel.

Expenditure observer Arvind Sharma chuan, Mizoram chu ram ralmuang, felfai taka inthlan buatsaihna ṭhin a ni tih a sawi a, chuti chung chuan, ECI-in inkaihhruaina a siamte ngai pawimawha zâwm zel turin official-te a chah.

Expenditure observer dang Anita Rinesh chuan, "Inthlanna felfai taka neih theih nana ECI ruahmanna hrang hrang cVIGIL leh application dang hman dante inzirtir nawn leh a ṭul hle," a ti a; official-te chu an hna chanpual ṭheuh ṭha taka thawk turin a fuih.

Police observer K Satyanarayana chuan, Mizo mipuite chu hmun ralmuanga awm leh mahni inthunun thei tak an ni tih sawiin, "Mi ṭhenkhatin ruihhlo leh dan phal loh thil ṭhenkhat an tawlh ru ṭhin a, a pawi hle. Hemi vèn nan hian ṭan lak a pawimawh lehzual. EVM leh strong room ven uluk a pawimawh a, fimkhur leh inthlahdah loa venhimna kalpui tur a ni," a ti.

Observer-te hian poling station-te tlawhin an endik nghal a ni.