Mizoram AAP-in Congress thláwp

Aam Admi Party (AAP), Mizoram hruaitute chuan nimin khan Aizawl Press Club-ah thuthar thehdarhtute an kâwm a; Lok Sabha inthlanpui awm turah Congress party candidate Lalbiakzama an thlàwp tih an puang.

AAP, Mizoram hruaitute chuan, Lok Sabha inthlan awm turah candidate an nei dawn lo tih an sawi a, "Central-a INDIA hnuaiah Congress-te nen thawhhona kan neih mek avang leh, Delhi lama kan hruaitute'n BJP paihthlak a, democracy tun din a nih beiseiin INC candidate lawm takin kan thawhpui dawn. Kumin inthlan hunah pawh a theih ang angin kan pui dawn a ni," an ti.

BJP sorkarna hnuaiah eptu party-te rahbehin an awm nasa hle tih sawiin AAP hruaitute chuan, "Dan hrang hrangte siam tharin, kan pu ber Arvind Kejriwal pawh Prevention of Money Laundering Act hnuaiah jail-ah an khung mek. Ani bakah hian kan minister pahnih jail-ah an khung mek a, mi dang pawh an vau reng bawk," an ti a; AAP hotute chunga BJP sorkar chêt dan chuan AAP an hlau hle tih a entira an ngaih thu an sawi bawk.