MNF Adviser-in an sorkar laia kawnga hmasawnnate a tarlang

MNF adviser K Lalsawmvela, MNF sorkar laia adviser to CM (technical) chuan nimin khan Aizawl Press Club-ah thuthar thehdarhtute a kâwm a, MNF sorkar laia kawng lama hmasawnna ṭhenkhatte a tarlang.

K Lalsawmvela chuan, Aizawl khawpui chhung hêlna by-pass road, Aizawl chhuah lama siam tawh (World Bank Road tia sawi ṭhin) bakah, a dang pahnih ruahman a nih thu a sawi a, "Aizawl by-pass road on the western side kan tih km. 45-a thui sialna atan state sorkar rawtna pawmin, PMDeVINE hnuaiah cheng vbc. 500 a hranpa ngatin union budget-ah dah a ni," a ti.

Aizawl hmar lamah pawh by-pass ruahman a nih thu sawiin Lalsawmvela chuan, "Sairang chhak aṭanga inṭan hi contract package pathumah siam a ni. He kawng kal dan tur NHIDCL consultant-in rawtna pathum a siam chu Chief Minister hoa sawihoin, CM duh dan tak chu NHIDCL pawhin pawmin final a ni," a ti a, khawmual chin package 1 leh 3 chu March 2023 khan contractor hnenah hna pek a nih tawh thu a sawi.

MNF Adviser sawi danin, Aizawl by-pass road on the western side chu Lengpui Airport kawng, Sihhmui aṭanga pêngin Tlawng lui kam a kal dawn a, Samtlang leh Lungleng inkara pheiin, Muallungthu ramah Aizawl-Lunglei World Bank Road a pawh ang. February 2023-a DPR thehluh chu mimal ram a sut tur zangnadawmna leh forest clearance tifel hmasa tura central-in a rawn tih avangin project a khawtlai lo thei lo a ni.

Sorkar laipui duh dan anga thil tihfel a nih hnuah November 2023-ah thehluh a ni a, technical thil, new technology hmang tura December 15, 2023-a an rawn rawt thar leh avangin January 15, 2024-ah an duh dan angin DPR ennawn (revise) chu thehluh a ni. Chumi hnuah sanction hmuh a ni a, March 9, 2024 khan Mizoram PWD chuan double lane turin tender a chhuah tawh a, April 30, 2024-ah tender hawn a ni ang.

K Lalsawmvela chuan, chief minister Lalduhoma'n January 8, 2024-a an party pisaah lei verh bikah harsatna deuh a awm leh cancel hial an tum mek thu a sawi tih sawiin, "MoRTH minister Nitin Gadkari a sawipui hnua pawm leh anga a sawi hi thangṭhat lak duh vanga mipui rilru dik loa hruai kawi tumna emaw, hriat chian loh vang emaw niin a lang," a ti.