Sum lapse awm lo, a lawmawm - ZPM

ZPM party chuan thuchhuah siamin, sorkar kum liam ta (2023-24) annual closing chu March 31, 2024 khan tluang taka zawh a nih thu an tarlang a, "Closing hi chief minister Pu Lalduhoma, Finance minister ni bawk chuan uapin, a uapna hnuaia sum lapse awm miah loa tluang taka financial year khar a ni hi a lawmawm," an ti.

ZPM chuan, sorkar kalphungah kum tin financial ending chu March 31 zanlai dar 12 a nih thu tarlangin, "Chuvangin, RBI lam pawhin government transaction khawih agency bank-te thlengin he mi nía office kai vek turin a hriattir ṭhin. Chutiang bawkin Treasury-a thawkte pawhin office an kai a ngai," an ti a; RBI-in zan dar 11-ah server an off dawn avangin chumi hmaa thil ṭul zawng zawng chinfel hman a ngaih thu an tarlang.

Kum 2023-24 financial ending chu Pathianni (Easter Sunday)-ah a tlâk avangin department dangte chu pisa kai loin, Treasury office-a thawkte chu pisa kai tura tih an nih thu sawiin ZPM chuan, "A mawhphurhna a nih angin Chief Minister-in Pathianni chawhma inkhawm bànah Aizawl North leh South Treasury-te a tlawh. Hetianga pa chan changa thawktute hnathawk hmáwr a bâwkpui hi kan chhuang hle," an ti.

ZPM party chuan, tun hnaiah party pakhat chuan thuchhuah siamin CM chu Pathianni bawhchhia ang hiala sakhuana hmanga mipui rilru a dik lo zawnga kawih her tumin an bei tih an tarlang a, "Sorkar khalh ngil tumna lam aiin politics-a inchirh thehna leh CM sawisel tumna hrim hrim a ang hle," an ti. Mihring khawsak phungah leh sorkar kalphungah ṭul bik thil leh, loh theih loh thil a awm fo thu an tarlang bawk.