Domestic tel loin gas man a tlahniam

Sorkar laipuiin eirawngbawlna gas (LPG) man a tihchhuah thar zûlzuin Mizoram sorkara Food, Civil Supplies & Consumer Affairs (FCSCA) department chuan gas man thar a tichhuak a, April 1, 2024 khan hman ṭan a ni. Gas man hi domestic cylinder man a danglam lo a, búr dangte man a tlahniam thung.

FCSCA department tarlan danin, Vairengte tih loh hmun dang zawngah gas domestic cylinder (kg. 14.2) man Rs 955 niin, a danglam lo a; commercial cylinder (kg. 19) man Rs 2,224.50 niin, Rs 30 chuangin a tlahniam. XtraTej (kg. 19) man Rs 2,247 niin, Rs 32-in a tlahniam a, composite (kg. 10) man Rs 688.50 niin, a danglam lo.

Vairengteah chuan domestic cylinder Rs 946, commercial cylinder Rs 2,209.50, XtraTeJ Rs 2,232 leh composite Rs 678.50 a ni.

November 1, 2022-a FCSCA department-in hriattirna a tihchhuah angin, Aizawl Municipal Corporation huam chhung leh district khawpui zawng zawngah home delivery kalpui tawh tur a ni a, gas bûr khatah a man pangngai bakah, delivery charge Rs 70 aia tam lo belh tur a ni.

Gas chu agency/distributor kudama hralh a nih chuan a man pangngai aṭangin Rs 33.43 paih tur a ni a, point delivery-ah sem a nih chuan a man pangngai bakah Rs 7.53 belh tur a
ni thung.

November 25, 2014-a sorkar thupek tihchhuah tawh angin, LPG distributor-in gas an pekna khuaah, a hlat záwng (kilometer zat) leh pawisa chawi belh ngai zat tarlante hmangin gas man chhût tur a ni a; rate dik tak hmangin distributor-te'n an huam chhungah gas an sem tur a ni tih a ni bawk.