MCC bawhchhiatna a la awm lo

Mizoram Lok Sabha inthlannaa returning officer Nazuk Kumar, Aizawl district election officer chuan press mite zawhna chhángin, Lok Sabha inthlan turah tun thlengin Model Code of Conduct bawhchhiatna kaihhnawih complaint an la dawn loh thu a sawi.

Aizawl DEO leh bawrhsap Nazuk Kumar hian nimin khan DC conference hall-ah press conference a nei a; Mizoram pumah mahni in lama vote thlak tur mi 1,600 chuang an awm thu leh Aizawl district bikah mi 874 an awm thu a sawi a, "Aizawl district-a home voting diltu mi 874 zinga 54 chu rualbanlote an ni," a ti.

Nazuk Kumar chuan, tun ṭum inthlanah hian home voting ti theite chu kum 85 chin chung lamte leh rualbanlo, rualbanlohna 40% chinte an nih thu a sawi a; Aizawl district bikah chuan April 8-ah home voting ṭan a nih dawn thu leh buaipui turin team 22 siam a nih thu a tarlang.

Zawhna chhanga Aizawl DEO sawi danin, vote thlâk tura mipui zirtirna programme, Systematic Voters Education & Electoral Participation (SVEEP) hnuaiah Art Exhibition buatsaih mek a ni a; concert, I-League-a hun hman, bikers rally, college-a electoral literacy club buatsaih, talk show, mi larte leh social media hmang ṭhinte hman ṭangkai leh flyer siamte kalpui tum a ni.

Aizawl DEO sawi danin, Lok Sabha Mizoram constituency atan general observer pakhat, police observer pakhat leh expediture observer pahnih ruat an ni a, tunah hian Mizoramah an awm vek tawh.

Electronic voting machine hman turte thliarna EVM randomisation ṭum thum neih turah ṭum khat neih a ni tawh a, April 9-ah leh April 10-13 chhungin neih leh a ni dawn. Polling official-te thliarna pawh ṭum hnuih neih a ni tawh a, a hnuhnung ber chu April 17-ah neih a ni ang.

Vote thlakna atana hman tur EVM-te chhuahpuina hmun, dispatch centre atan Bawngkawn Brigade Field leh Tlangnuam Field-te hman a ni dawn a; vote thlak zawha EVM dawn khawmna hmun receiving centre chu Assembly Annexe basement, DC office building leh Aizawl College-ahte siam a ni.

IPR department directorate hmunah Media Cell dah a ni a, DC office-ah control room dah a ni thung a; hengahte hian eng lai pawhin duty an awm a, MP inthlan chungchang harsatna nei leh zawh duh neite tan engtik lai pawhin number 1950 (toll free) leh phone number 0389-2317440-ahte biak theih a ni.