State sorkar nen hrui khat vuanin ram tan kan thawk ang - Vanlalvena

MNF Lok Sabha MP candidate K Vanlalvena chuan, MP atan thlan tlin a nih chuan ram hnuk khawihah chuan state sorkar nen hrui khat vuanin an thawk dun thei dawn niin a sawi.

K Vanlalvena hi nimin khan Pachhunga University College Students Union hruaitute nen an inkâwm a, "MP atan thlan tlin ka nih chuan kan hnam leh sakhaw tan ka thawk ang a, state sorkar nen hrui khat vuanin ram tan kan thawk ang," a ti.

Zirlai hruaitute zawhna chhangin Vanlalvena chuan, Myanmar aṭanga rawn raltlante chu India sorkarin refugee-ah a la pawm lo tih a sawi a, "Unau kan nih tlat avangin MNF sorkar kal ta khan India sorkar thu leh hla dodalin kan unau rawn tlante chu hmangaih takin a lo enkawl a, an tana thlamuanna nih ve zel ka tum," a ti a; India sorkarin a remti lo chungin Parliament-ah raltlante tan a au chhuak niin a sawi.

NDA-a BJP leh MNF thawhho chungchangah K Vanlalvena chuan, "NDA thawhpui chung khan kan hnam leh sakhaw chung-changah chuan BJP thil tum dodaltu awm chhun ka ni. Lok Sabha MP atan mipui khawngaihna vanga thlantlin ka nih chuan he ram leh hnam tan hian ka dinna a la pangngai reng a, kan sakhua leh hnam pawisawina tur chi chu ka do zel ang," a ti.