Sorkar nena ṭha taka thawkho thei tur MP thlan a pawimawh - Lalduhoma

ZPM leader Lalduhoma, chief minister chuan, state-a sorkar lai nena ṭha taka thawkho thei tur leh sorkar thláwptu MP thlan chhuah a pawimawh thu a sawi.

Lalduhoma hian March 3, Nilaini zana Vantawng Group YMA Rûn, Thenzawla an party mite nen an inkawmnaah thu sawiin, "Lok Sabha MP atan Mizoram mipuiin duh taka an thlan tlin sorkar lai nen ṭha taka thawkho thei tur, sorkar thláwptu thlan tlin a ṭul," a ti

Lalduhoma chuan, central-ah zawm emaw, do emaw an nei dawn lo tih sawiin, "A páwng a puiin central sorkar kan do dawn lo. Thlàwp theihna leh puihna àwm chinah kan thláwp dawn," a ti a, ram leh sakhaw tana him lo chinah huaisen taka an do tur thu a sawi.

Thla li chhung sorkarna an chelh tawh tih sawiin Lalduhoma chuan, "Cheng vaibelchhe eng emaw zat kan hmu tawh. Central-a sorkarna chelhtute pawl emaw, lehlam pawl emaw zuk nih kher a ṭul lo," a ti.

Lalduhoma chuan, central-ah pawl pahnih lian pui pui an awm mek tih sawiin, "A khawi lamah mah kan ṭang dawn lo," a ti a; ram leh sakhaw tana pawi thei an tih dawna dodal thei tura zalen taka chu a ṭha ber nia an hriat thu a sawi.