Thla 11 chhungin lirthei 24,204 ziak lut Lirthei ziah luh zinga 71.70% two wheeler

Mizoram Transport department chuan December 31, 2023 thleng khan lirthei 3,07,224 an ziak lut (register) a; sorkar kum kal mekah April 1, 2023 aṭanga kumin February thla thleng, thla 11 chhungin lirthei 24,204 an ziak lut a, chu'ng zinga 17,354 (71.70%) chu two wheeler a ni.

Transport department-in lirthei ziah luh tawh zat an chhinchhiah chinah, February 2024 dinhmun angin, lirthei ziah luh tawh zinga tam ber chu two wheeler niin, 2,09,340 a ni a; lirthei ziah luh tawh zawng zawng 3,07,224 aṭangin 68.14% a tling.

Sorkar kum hmasa 2022-23 tàwp (March 2023) thlenga two wheeler ziah luh tawh zat chu 1,91,986 a ni a, kum 2023-24 kal mekah two wheeler 2,09,340 a awm tawh a, thla 11 chhungin two wheeleer 17,354-in a pung tihna a ni.

Lirthei ziah luh zinga tam ber dawttu chu car niin, 51,940 a ni a, lirthei ziah luh tawh zat aṭangin 16.91% a ni. Lirthei ziah luh tam ber leh a dawttu inthlauhna hi 1,57,400 a tling.

Sumdawnna lirthei, bungraw phur chi 22,123 (7.20%) ziah luh a ni tawh a; three wheeler (auto-rickshaw) 6,233 (2.03%), motor cab (taxi) 5,871 (1.91%), two wheeler taxi 3,854 (1.25%), maxicab 2,400 (0.78%) leh bus 593 (0.19%) ziah luh a ni tawh bawk.
Transport department tarlan danin, sorkar kum hmasa 2022-23 chhungin lirthei 27,143 ziah luh a ni a; sorkar kum kal mekah February 2024 thlengin lirthei chi hrang hrang 24,204 ziah luh a ni tawh.