BJP do turin politics-ah ka zuang lut - Lalbiakzama

Lok Sabha MP atana INC candidate Lalbiakzama chuan nimin khan Chawngte-C leh Tlabunga vantlang inkhawmah thu a sawi a, "BJP do turin politics-ah ka zuang lut a ni," a ti.

Lalbiakzama chuan politics-a a luh chhan sawiin, "Central lama BJP-te rorel dan ka thlirin, BJP rorelna do tura ke ka pên chhuak lo a nih chuan nakin zelah kan tu leh fate'n min la dem dawn nia ka hriat avangin BJP do turin politics-ah ka lo zuang lut a ni," a ti a; sorkar hna aṭanga a pension tirhah politics-ah luh a tum loh thu leh pawl ṭhenkhatin an sàwm pawhin a hnar thu a sawi.

INC Candidate sawi danin, Vir Sarvarkar-a'n kum 1923-a Essential of Hindutva tih lehkhabu a ziah chu RSS hoin an bible-ah an hmang a, Hindu ni lo, sakhaw dangte chungah râwvâ takin an che zui a; India rama hnam tlem zawk leh sakhaw tlem zawkte tihboral tumin hma an la chho a ni.

Lalbiakzama chuan, BJP-te chu an che buan buan ngai lo a, fing tak leh thiam takin an che chho tih sawiin, "Kum tam taka ruahmanna an neih tawh chu tunah hian an tihlawhtling chho mek. Hman ní lawkah Ayodhya-ah Ram Temple sain, Uniform Civil Code pawh BJP an sorkar leh a nih chuan an hmang tawh ang," a ti.

Manipur buaina chungchangah Lalbiakzama chuan, "Congress kaihhruai INDIA a sorkar chuan Manipur-a kan unaute buaina leh harsatna hi kan chingfel dawn, thil harsa a ni lo, a awlsam lutuk," a ti a; prime minister Narendra Modi-a'n tun thlenga a la tlawh loh thu a sawi.