Congress candidate hi beiseina awm chhun a ni - Lalnunmawia

Mizoram Pradesh Congress Committee (MPCC) vice president Lalnunmawia Chuaungo chuan, Mizoram MP atan Congress candidate chu India ram hmun hrang hranga rawngbawlna zau zawk kawng hawngtu atana beiseina awm chhun niin a sawi.

Lalnunmawia Chuaungo hian nimin khan Champhai Press Club-ah thuthar thehdarhtute a kâwm a; "Congress candidate Pu Lalbiakzama kan vote chuan India ram hmun hrang hranga zau zawka rawng kan bàwl theihna kawng hawngtu atana beiseina awmchhun a ni a, Pathian rawng kan bàwlna atana ke kan pên vena a ni," a ti.

MPCC Vice President chuan, "MNF emaw, ZPM emaw candidate in vote chuan BJP in vote tihna a ni a, kohhran rawngbawlna leh chanchin ṭha hrilh hna pawh thawk thei lo ila a pawi kan ti lo tihna a ni," a ti a; MNF chu BJP thawhpuitu an nih thu leh ZPM chu BJP àwntu an niin a sawi.

MNF nen thawhho tumin an inbia tih sawiin Lalnunmawia chuan, "BJP kaihhruai NDA an chhuahsan theih loh avangin kan thawkho thei ta lo. CAB an pass pui ang tho khan an ti leh ang a, BJP tichaktu tur an ni. ZPM pawh hian BJP an àwn tih a hriat. An candidate chuan MNF candidate ang thoin issue base-in BJP kan pe ang an ti mai a ni," a ti a; MNF leh ZPM chu BJP tichak tura thawktutte niin a sawi.

Lalnunmawia Chuaungo chuan, BJP leh RSS-te chu India ram, Hindu lal rama siam tumtu an ni tih sawiin, "Hindu lal ram siam tumna dodalna hi mi dang tih turah dah ngawt chi a ni lo a, a thawktu tur chu keini ho hi kan ni. Uniform Civil Code hi RSS agenda a ni a, BJP hi a tihlawhtlingtu hmanrua an ni," a ti.