MP thu sawi thei ringawt ni lo, a taka thil ti thei neih a ngai - BJP Candidate

BJP, Mizoram Pradesh president leh MP candidate Vanlalhmuaka chuan April 3, Nilaini khan Zamuang community hall-a vantlang inkhawmah thu sawiin, Mizoramin MP thu sawi thei ringawt ni lo, a taka thil ti thei a neih ve a ngai tawh niin a sawi.

Vanlalhmuaka chuan, "Mizoram hian MP thu sawi thei ringawt ni lo, thil ti thei kan neih ve tawh a ngai. Mizorama sorkarna chelh mek ZPM sorkara minister-te'n Central-a Mizoram mamawh an thlen hunah leh puih an ngaih huna pui turin, Bible-a Josefa dinhmun ang kha BJP MP candidate-in ka hna tur leh ka dinhmun tur a ni," a ti a; party politics dahṭha a, amah vote turin mipui a sáwm.

BJP President chuan, mipui chu gas connection a thlàwna an dawn leh dawn loh te, mirethei in sak ṭanpuina an dawn leh dawn lohte a sawi a; "Mizoramin BJP MP kan neih chuan hetiang hamṭhatna zawng zawng hi kan dawn vek dawn. Loneitute kum 60 an tlin hnua pension pek an ni dawn a, Hachhek tlangdungah rural bank hawn ngei a ni dawn," a ti.

April 3, 2024 vek khan Mamita BJP vantlang inkhawmah BJP MLA Dr K Beichhua'n thu a sawi a; "BJP official candidate Pu Vanlalhmuaka hi kan thlang tling a nih chuan central minister a ni dawn a, Mizoram MP a ni satliah dawn lo," a ti. Mizoramin hmasawnna kailàwn a zawh theih nan kailàwn neitu BJP thlan a ṭul thu a sawi.