Central-ah tu pawh sorkar se, ṭhian ṭhaah siam kan tum - Lalrinpuii

Mizoram sorkara minister leh ZPM Southern Headquarters president Lalrinpuii chuan, ZPM party-in sorkar laipuiah sangawi zawnpui an nei dawn lo a, chutih rualin, tu pawh sorkar se, ṭhian ṭhaah siam an tum thu a sawi.

Lalrinpuii hian nimin khan Siaha Bazara vantlang inkhawmah thu sawiin, "Central sorkarah tu pawh sorkar se, an bâwihah ṭang loin ṭhianah siama thawhpui kan tum, anmahnia lut si loin issue base-in huai takin kan che dawn a ni, tih hi nghet taka kan dinna a ni," a ti.

MPF awmna apiangah ZPM party chu an thla a muang ṭhin nia sawiin Lalrinpuii chuan, "Candidate-te tan a zângkhaiin sum sên hautak tur min venpui. Pathianin ram hruaitu turin mi ruat a nei ṭhin a, tun hi ZPM party tana chung lam hun ruat a ni," a ti a; ZPM sorkar chu mipuiin an enchhinna ni mai loin, beiseina sang tak an neihna a nih thu a sawi.

Lalrinpuii chuan, Lok Sabha inthlanah pawh mipuiin ZPM an duhsak leh ngei a rin thu a sawi a, "BJP sangawi zawnpui MP kan nei leh ang tih hi thil hlauhthawnawm tak a ni. Kan ram leh kan sakhuaah nghawng ṭha lo tak nei thei a nih avangin kan fimkhur a ngai. Kan ram, kan hnam leh sakhua a dam theih nan MP inthlan awm turah hian kan vote-na tur kan chian a ngai a ni," a ti a; ZPM candidate Richard Vanlalhmangaiha chu Mizoram mamawh engkim sorkar laipuia thlen theitu tur a nih avangin vote turin mipui a sáwm a ni.