Lok Sabha inthlan awm tura Inbuatsaihnate Serchhipah thlirho

April 19, 2024-a Lok Sabha inthlan awm tura inbuatsaihnate nimin khan Serchhip district election officer (DEO) David Lalthantluanga hoin DC conference-ah mawhphurhna hrang hrang neite'n an thlirho.

Serchhip DEO chuan, vote thlak ní a hnai tial tial tih sawiin, "Inbuatsaihna pawhin a vàwrtàwp a thleng mek. Inthlanna felfai leh thianghlim kan neih theihna tura mawhphurtu zawng zawngte'n theihtawp chhuah a ṭul," a ti a; inthlan inbuatsaihnaah mawhphurtute a huhoa inkoh khawm hnuhnung a nih tawh dawn avangin ṭul leh pawimawh zawng zawng kim chang taka sawi turin member-te a chah.

Serchhip SP MS Dawngkima pawhin thu sawiin, "Venhimna kaihhnawiha inbuatsaihna a zo thawkhat. District páwn leh state páwn aṭanga venhimna hnathawk tur security force-te dawnsawn danah department dang, a bik tak Power & Electricity leh PHE-te min ṭawiawmna a pawimawh," a ti.

Serchhip district hi sector 14-ah ṭhen a ni a, sector officer leh sector police pakhat ṭheuh ruat a ni. Sector ṭhen viltute hian an bial ṭheuhte fangin, venhimna dinhmun leh vote thlakna tura hmanraw mamawh hrang hrang dinhmun an enfiah.

Enfiahna aṭangin polling station ṭhenkhat, tui leh kawlphetha hmu ṭha tâwk lo te, mamawh la nei kim lo te, wheelchair nawrna tur ramp la nei lote leh thil fel lo ṭhenkhat an hmuhte ṭhutkhawmah hian an sawi a; chinfel dan tur sawiho nghal niin, inthlan hmaa inpeih vek tura hriattir an ni.

Tun dinhmunah Serchhip district-a polling station tam zawk chu an inbuatsaih zo tawh a, thawm ṭhat ngai tlem la awmte pawh inthlan hmaa peih hman tura beisei an ni.