Rem lo chunga CM beiah BJP puh

ZPM Ṭhalai chuan thuchhuah siamin, BJP, Mizoram Pradesh president Vanlalhmuaka chu ZPM sorkar itsik a, rem lo chunga Chief Minister beiah an puh.

ZPM Ṭhalai chuan, "April 1, 2024-a Mizoram BJP President-in press mite hmaah CM Lalduhoma leh minister-te'n sorkar laipuia minister-te an dàwr chungchang dik lo taka a sawi ngam mai kha mak kan ti hle. Rem leh rem loa sorkar lai beih tumnaah kan ngai," an ti.

Sorkar thar a pian phatah prime minister Narendra Modi-a'n ZPM leh CM thar Lalduhoma duhsakna a hlan tih sawiin, "Mizoram hmasawnna tur a nih phawt chuan engti hawi zawng pawha puih a tum thu a sawi chhuak hial. Central minister-te dawra CM zin chhuak kha a hlawhchham lo mai ni loin, Mizoramin hma a sawn ngei ngeina tur thil tam tak a rawn hawn zawk a ni," an ti a; Mizoram BJP President ngaihdan anga BJP thlàwp leh thlàwp loh lamah ZPM sorkar thar hi a innghat lo tih an sawi.

ZPM ṭhalaite chuan, CM Lalduhoma'n union minister hrang hrang - Home, Finance, Health, Railways leh Minority Affairs changtu minister-te leh sorkar laipuia mi pawimawhte a hmuhnaah chanchin lawmawm lo hriat tur a awm lo tih an sawi a, "Sorkar tharah beiseina thar nen hmasawnna lam hawi an lo sawipui vek zawk a ni," an ti bawk.