Chhiatrupna hmachhawn dan tur sawiho

Disaster Management & Rehabilitation department (DM&R) hotute leh 1st Bn National Disaster Response Force (NDRF), Guwahati hotute chuan nimin khan Raj Bhavan-ah governor Lt. Gen. Nirbhay Sharma an kawm a, khuarel chhiatna lo thleng theite rilru inpuahchah lawkna nena mipuite'n an hmachhawn theih dan tur an sawiho.

Larsap chuan chhiatrupna thleng thei thil chi hrang hrangte rilru fim taka hmachhawn a nih theihna atan Mizoram mipuite chu ngunthluk zawka vawi tam tak zirtirna pek a ṭul tih sawiin, "In-chhanchhuah dan te, lo inrinlawk dan bakah hliam tuarte bawihsawm dan chi hrang hrangte pawh a rang lama zirtir an ngai," a ti.

Governor chuan mipui zirtirna kawng-ah ṭawngka a sawifiah tum mai a tawk loh thu sawiin, lemchan nena zirtirna kalpui nasat a ṭul tih DM&R leh NRDF hotute a hrilh a ni.

DM&R leh NRDF hotute hian Larsap nen an inkawm zawhah Raj Bhavan-a hnathawkte leh an chhungte lirnghing lak him theihna kawng hrang hrang te, lirnghing a thlen a insaseng dante leh damdawi-in panpui hma a hliam tuarte enkawl dante an zirtir.