Mizoramah buhfai dinhmun a x tawk - FCSCA Minister John Rotluangliana

Food, Civil Supplies & Consumer Affairs (FCSCA) minister John Rotluangliana chuan, Mizoramah buhfai dinhmun aṭhat tâwk thu a sawi a; ZNP-te'n Lawngtlai district-a Vaṭhuampui kudamah buhfai a awm lo nia an sawi chu quintal 286.56 a awm thu a sawi bawk.

Supply Minister hian nimina thuthar theh-darhtu ṭhenkhatte an kawmnaah, Zuangtui kudam pathumah buhfai chhêk ngah vek a nih thu a sawi a, "April thla aṭangin thla khat quota pek chhuah tur chu retailer-te tan phurrit a nih dawn chuan, thla chanve quota pawh pek chhuah theih tura ruahmanna siam theih a ni," a ti.

Vaṭhuampui kudam ruak nia ZNP-in an sawi chu chhángin John Rotluangliana chuan, chanchin thara a lan hnuah Lawngtlai DCSO-in sub-inspector tírin an endik nghal tih a sawi a, "April thla tur a full-in mipuiah pêk chhuah vek a nih hnuah qtl. 286.56 a la awm tih finfiah a ni," a ti.

Rotluangliana chuan, "Eptu party-te hian a siamṭhatna lama insawisel ai chuan, kudam ruak leh lei chim ringawt an sawi vâwng hi a ṭha lo hle a ni," a ti a; sorkar mualpho se tih ringawt chu eptute awm dan tur a nih loh thu a sawi.

Food Security Act kalpui mekah ration card a chhuak lo titu tam tak chu India khua leh tui ni lo, EPIC pawh nei lo an nia sawiin, Supply Minister chuan, "EPIC nei chauh ration card siam theih a nih vangin khua leh tui dik tak thliarna remchang ṭha tak a ni," a ti a; dik lo taka ration card neih tumte vên nasat a nih thu leh, ration card siamṭhat aṭangin chhungkaw sing thum paih theih an beisei thu a sawi.

FCSCA Minister chuan, ration card chu tun hma chuan siam a awlsam a, retailer-te pawhin sum siam nan a chuangtlai an nei ṭeuh ṭhin tih a sawi a, "Tuna card siamṭhat hian nasa takin a titlahniam dawn. Buhfai chhêk khâwl turin theihtawp chhuah mek a ni a, May 2016 thlengin buhfai supply hna thawk turin hun a awm a, buhfai a khaihlak loh nan tender leh vat a ni ang," a ti.