Chin sorkar thar lawmnaah MZP tel

April 17-18, 2016-a Rih-Khawmawi, Myanmar-a National League for Democracy (NLD) party bultuma Aung San Suu Kyii kaihhruai mipui sorkar leh Chin state sorkar thar lawmnaah sawm an nih angin MZP-te an tel tih an tarlang.

MZP tarlan danin, Aung San Suu Kyii kaihhruai mipui sorkar leh Chin state sorkar thar lawmnaah hian MZP Lalsangzuala Ngente leh assistant general secretary Joseph K Zohmingliana te bakah, hruaitu dangte an tel a; Lalsangzuala Ngente-in thu a sawi ve a ni.

Chin state chief minister Lian Luaia, Chin state Parliament speaker Zo bawih leh Chin Affairs minister Lal Thawm Thanga te hnenah MZP chuan lawmpuina thuziak an hlan.

MZP President chuan, "Zofa unau hmun hrang hranga awmte ṭawng hrang kan hman avang maiin unau kan ni tih hi kan in hre lo mai palh ang tih ka hlau. Zofa unauten kan ṭawng hman ṭheuh hi Mizo ṭawng a ni. Chin state-a kan kal chuan Chin mi kan ni a, Chin ṭawng pawh Zo ṭawng a ni tih kan hriat a pawimawh hle. Zo hnam chi hrang hrangte hi inhaw tham kan awm lova, kan thinlungah inunauna awm se, inpuih tawn kan ngaihna apiangah inpui tawn zel tur turin Zofa unau zawng zawngte kan sawm vek a ni," a ti.

MZP hruaitute hi Rih-Khawmawia hun an hman zawh hnuah April 21-26 chhunga Chin khawpui Hakha-a 18th Chin University Students Fellowship Conference-ah an tel nghal dawn a ni.