Medical college tura bangboah minister puh

MNF party chuan thu-chhuah siamin, State Referral Hospital, Falkawna medical college din tumnaah Health minister Lal Thanzara chu a bangbo hle niin an tarlang.

MNF thuchhuah chuan, MNF sorkar laiin cheng vbc. 40 sêngin Referral Hospital dinna atan administrative building leh quarters zawng zawng sa zo niin a tarlang a, "Khum 300 awm theihna tura buatsaih kal mekah, Congress sorkarin medical college din tum nia insawiin, Mizoram Institute of Medical Education and Research (MIMER) tiin an phuah a. Medical college din tuma an hmalaknaah Health minister Pu Lal Thanzara thusawi leh State Referral Hospital-a deputy medical superintendent Dr Jane Ralte thusawi a inkalh tlat a ni," an ti.

MNF chuan Health Minister chu medical college hming tur Assembly House-a zawhna chhang thei lo-ah puhin, June 9, 2014-a Health Minister hoa medical college dinna atana Advisory Committee ṭhutkhawmnaah Lal Thanzara’n August 2015-ah class ṭan theih beisei a nih thu a sawi ngawt mai niin an sawi a; Assembly House-ah Medical Council of India (MCI)-in November 2015-a endik tur anga a sawi laiin, April 2016 thlengin MCI-in Mizoram leilung an rah âwm an hriat loh thu an tarlang.

Referral Hospital Dy. Medical Superintendent-in medical college din tum dan an sawiah Health Minister chu a mualphoa an ngaih thu sawiin, MNF chuan, "Medical college nei mai tur anga Congress sorkarin hahîpa an sawi fo pawh inbumna ang maiah a chang zo a ni," an ti.

MNF chuan, MNF sorkar laia Referral Hospital building an sak tawha damlo khum 150 dah a ni ta chu lawmawm an tih thu an sawi a; "Referral Hospital/medical college atan bakah office leh staff quarters atana ban pakhat pawh la phun ve lo Congress sorkar hian mipui hnenah thudik sawi ngam ṭhin turin kan chah a ni," an ti bawk.