Medical Attendance Rules hman tum Dan tharah MR bill a tlem sawt dawn
Sorkar hnathawkte'n anmahni leh an chhungte an damlohna thila an inenkawlna senso an bill theihna (medical reimbursement)-ah dan thar duan mek a ni a, dan thar hi hman a nih hunah chuan MR bill atana sum sen a tlem sawt dawn bakah, Medical Attendance Rules hman a ni tawh dawn.
Vanglaini palai zawhna chhangin Finance minister Lal-sawta chuan, MR bill dan thar tur ruahman mek a ni tih a sawi a, "MR bill dan duan thar tura din Sub-Committee-te rawtna chu Committee sang zawkin an thlirho tawh a, siamṭhat ngai leh belh ngai nia hriatte Sub-Committee hnenah ti ṭha turin an thawn leh a ni," a ti a; Sub-Committee chuan ti ṭhat ngaite an tih ṭha ṭêp tawh tih a sawi.
Lalsawta chuan, MR bill dan thar peih a nih hunah chuan sorkar sum sên a tlem sawt dawn tih a sawi a, "Sorkar hnathawkte tan mamawhna thil tak takah chuan inthlahrunna tur a awm chuang dawn lo," a ti.
Finance Minister sawi danin, MR bill dan tharah hian damlo sum mamawhte'n an mamawh hun takah sum an hmuh theih dan tur ngaih pawimawh tum a ni a, an mamawh hun takah pek ṭhin tum a ni. Mamawh hun taka sum inpek chu a ṭhat mai bakah, bill a tàn rei lutuk chuan senso a tam zawk niin sorkar chuan a hria a ni.
MR bill dan tharah Medical Attendance Rules hman tum a ni tih sawiin Finance Minister chuan, "Medical Attendance Rules-ah hian sorkar hnathawkte'n MR an bill sak theih chin a chuang vek dawn a, tun dinhmunah chuan department-te an inhawng zau mah mah a ni," a ti.
Lalsawta chuan, sorkar hna-thawkte'n MR an bill sak ve theih loh tan pawh RSBY leh health insurance-te tih theih reng a nih thu a sawi a; chungte chu
ṭangkai zawka hman a nih theih dan tur ngaihtuah zel tum a nih thu Vanglaini a hrilh.
Chief minister Lal Thanhawla chuan MR bill tam lutuk ṭhin a vei thu Assembly House-ah a lo sawi tawh a, "Phai lama inenkawl apiangin an nawm an mâkin an hmang a ni. Hengte hi kan break (titawp) dawn nge, sorkar hnathawkte hi MR bill-ah kan classified (thliar) dawn tih rilruah a awm. Bill sang ṭhin lutuk hi tihtawp vat a ngai a, kan state ang chuan kan tlin lo," a ti.
Chief Minister sawi danin, state ṭhenkhat chuan MR bill chu miin an dil ang ang pe tawp loin, an enfiah nawn vek ṭhin a; Mizoramah chuan bill an thehluh ang ang an pe tawp tawp ṭhin. State ṭhenkhatah chuan sorkar hnathawkte'n an MR bill atan thawh an nei ve ṭhin a, chutianga tih ve dan tur chu Mizoram sorkarin a ngaihtuah a ni.
MR bill dan kalphung thar duang tur leh senso a tlem theihna atana rawtna siam tur hian Chief Secretary kaihhruaina hnuaiah Sub-Committee din a ni a; thla ruk chhunga rawtna thehlut tura tih ni mah se, a rei deuha hriat vangin thla thum chhunga thehlut tura tih leh an ni.