Infiammi tiṭha zualte lawmman hlan an ni

Sports & Youth Services (SYS) department-in Mizo infiammi tiṭha zualte tana lawmman, Sports Incentive Cash Award a sem ṭhin chu nimin khan Hawla Indoor Stadium-ah hlanna inkhawm neih a ni a; parliamentary secretary Joseph Lalhimpuia'n a dawng turte hnenah a hlan.

Sports incentive cash award hlanna hun hi SYS director Zothanmawia'n a kaihruai a; cash award hi Mizoram páwn - international, national leh regional-a inelna leh Special Olympics, Los Angeles-a neiha tiṭhate hnenah hlan a ni.

Joseph Lalhimpuia chuan, insûmtheihna aṭangin hlawhtlinna a awm ṭhin tih sawiin, infiammite chu an theihna (talent) hâi chhuahna kawngah insûmtheihna nei turin a chah a, "Mizoram sorkarin infiammite hma ngaiin theihtawp a chhuah a, infiamna hmanrua leh hmunhmáte a theih angin a ngaihtuah a ni," a ti.

Joseph Lalhimpuia chuan, infiammite tan Defence, bank leh Railways-ahte hian luh theihna kawng a awm thu sawiin, chu'ngte chu hmang ṭangkai turin infiammite a chah a ni.

Sports incentive cash award hi kum li chhung - kum 2012-13 aṭanga 2015-16 chhung sem a ni lo tawh a; chungte chu nimin khan Aizawl district-a mite hnenah sem niin, mi 1,273 hnenah Rs. 128,50,000 sem a ni. District dangah pawh sem a ni dawn a; Ser-chhip district-ah April 21-ah, Mamit leh Champhai district-ah April 22-ah leh Lunglei, Lawngtlai leh Saiha district-ah April 26-ah sem a ni ang.

Mizoram sorkar chuan kum 2001-ah infiamnaa inelnaa ti ṭha zualte'n hamṭhatna an hmuh theih nan dan (rules) a siam a, chu chu kum 2003-ah changtlung zawka siamṭhat niin, Mizoram Sports Incentive Cash Award Rules tih a ni. Sport incentive cash award dawng hmasa ber chu Jenny R Lalremliani niin, kum 2001-02 khan 1st Asian Women Boxing Championship, Bangladesh-ah silver medal a dawn avangin Rs. 80,000 pek a ni.

SYS incentive cash award

Kum Dawngtu Sum sem

2001-02 1 Rs. 80,000

2002-03 131 Rs. 17,27,000

2003-04 118 Rs. 7,52,750

2004-05 80 Rs. 5,87,750

2005-06 189 Rs. 9,35,750

2006-07 356 Rs. 19,03,000

2007-08 222 Rs. 10,29,300

2008-09 290 Rs. 14,99,750

2009-10 302 Rs. 22,60,250

2010-11 580 Rs. 64,28,250

2011-12 397 Rs. 20,19,000

2012-13 314 Rs. 23,46,000

2013-14 443 Rs. 44,13,250

2014-15 393 Rs. 41,75,250

2015-16 607 Rs. 56,95,250

Total 1,757 Rs. 1,66,29,750