World Autism Awareness Day

Spastic Society of Mizoram chuan nimin khan Gilead Special School, Bawngkawnah World Autism Awareness Day an hmang a, Health minister Lal Thanzara'n a hmanpui.

World Autism Awareness Day hi a ní tak chu April 2 a ni a, remchan zawkna avangin nimin khan an hmang a ni.

Lal Thanzara chuan, autism chu Mizoramah hmelhriat hlawh vak lo mah se, nei an awm nual tawh tih sawiin, "Kum kal ta aṭanga din autistic naupangte enkawlna bik sikulah naupang pariat awmin, la lut remchang rih lo pawh an awm a ni," a ti a; fate vanduaina la pawm thei lo, anmahni enkawlna bik hmuna hruai nachang la hre rih lote chu an fate nihna pawm a, enkawlna ṭha an dawn thuai theih nana hruai ṭheuh turin a sawm.

Health Minister chuan, autism awmzia chu Mizo mipui zingah sawi zau a ngai hle tih sawiin, "Kan hmelhriat tawk loh avangin autistic fa nei nu leh pa ṭhenkhat chuan an fate nihna tak an hre mai thei
ṭhin lo a, hei hian enkawlna ṭha an dawnna tur kawngah a tikhawtlai thei a ni," a ti.

Kum 2015 khan autism enkawlna hi Communication DEALL, Bangalore nena thawkhoin Gilead Special School-ah din a ni.