MUP-in inkhawmpui lian an hmang Zu permit neite khauh zawka thunun an duh

Mizoram Upa Pawl (MUP) chuan nimin khan Vanapa Hall-ah General Assembly an hmang a, Social Welfare minister PC Lalthanliana'n a hmanpui. MUP chuan, zu lei phalna permit neite khauh zawka thunun an duh.

PC Lalthanliana chuan, vanglai leh ṭhatlai hun chhunga chhungkua, khawtlang, kohhran leh ram tana mi ṭangkai tak lo ni ṭhin an nih avangin MUP member-te chu tumahin an ngainêp thei lo tih a sawi a, "Kan ram leh hnam kal zelna turah MUP-te hian tih tur pawimawh tak an nei a ni," tiin, châwl mai thei an la ni bik lo tih hre reng turin a ngen.

Tun dinhmun aṭanga hma-sawnna kawnga ke pên turin sum leh pai sên tam a ngai lo tih sawiin Minister chuan, "Ngaihhlut tur dik tak ngaihlu a, buaipui tur dik tak buaipui tur a ni," a ti a; tih dan
ṭha lo bansan a, tih dan ṭha zawk ti tura inbuatsaih chunga hmasawnna lamtluang zawh tura inbuatsaih turin MUP member-te chu a sawm. PC Lalthanliana hian MUP hnenah hian Rs. 1,00,000 a hlan.

Inkhawmpui hi president RK Thanga'n a kaihruai a, April 2015 leh March 2016 inkara an member thi mi 1,483-te sûnna hun an hmang.

Thi zinga upa ber chu Ramthangi (107), Tuikual South a ni a, mitthite kum chawhrual chu kum 83.57 niin, inkhawmpui hmasaa an sûnte kum chawhrual aiin kum 7.07-in a tam.

MUP-te hian chawhnu lamah rorel inkhawm an nei a, an thu rel zingah hengte hi a tel:

1. Zu permit sorkarin a pekte control-na hi a takin tun aia nasa leh-zualin ṭan lak ni rawh se.

2. Mizoram sorkar hian Senior Citizens Maintenance Rules angin Tribunal din ve ngei rawh se.

3. Sorkar laipuiin upate dikna leh hamṭhatna a siam anga tihpui-tlin ngenna atan Mizoram sorkarin hma la rawh se.

'Mizo mipate'n kan nupuite nu leh pa kan koh dan inang tlang lo hi koh dan inang tlanga koh a nih theihna atan MUP hian hmalak ni rawh se' tih chu executive committee ngaihtuah atan an dah thung.