KHAWTHLIR

National Public Relations Day

Public Relation Society of India (PRSI), Mizoram Chapter buatsaihin naktuk, April 21 chawhnu dar 1 hian Aizawl Press Club-ah National Public Relations Day hman a ni dawn a, IPR minister Lal Thanzara'n a hmanpui ang. MJA member-te he hun hmanpui tur hian sâwm an ni.

Hospital report

March 2016 chhung khan Aizawl Civil Hospital-ah mi 37,296 an inentir a, mi 1,087 admit niin, mi 238 chu state páwna thawn an ni. March thla chhung vek hian naupiang 374 an awm a, mitthi 79 an awm bawk.

Saihaah training

Saiha City Mission Management Unit, UDPA department buatsaihin nimin khan Saiha DC conference hall-ah 'Training on Street Vendors under DAY-NLUM' buatsaih a ni a, Saiha khawpui chhunga village council member-te an tel.

HME Director

Aizawl Civil Hospital-a medical superintendent Dr Rosangluaia chu Hospital & Medical Education director atan dah a ni a, nimin khan order a chhuak. Dr Rosangluaia hian Dr Lalbiakkima a thlak a ni.

Pawm vek

Chakma Autonomous District Council (CADC)-a, Mandirasor bial ruak hnawh khahna tura by-election April 28 a neih tur atana hming pe lutte chu nimin khan endik a ni a, pawm vek an ni. Hming pe lutte chu Congress candidate Onish Moy Chakma, MNF candidate Purna Chandra leh BJP candidate Laxmi Bikash Chakma-te an ni.

Cigarette man

Serchhip District Level Anti-Tobacco Squad leh Serchhip District Legal Metrology chuan, Thawhṭanni leh nimin khan Serchhip khawpui chhunga dawr hrang hrangah cigarette mihring tana a ṭhat lohzia hriattirna ziah lohna an vai a, cigarette bawm 871 an man a, a neitute chu pawisa an chawitir.