Pension tawh rawih nawn MZP-in CM an sawipui

MZP hruaitute chuan nimin khan chief minister Lal Thanhawla chu a pisaah an kâwm a, sorkar hnathawk pension tawh rawih nawn chungchang an sawipui.

MZP thuchhuah chuan, Mizoram sorkara pension hun tawh service pawhseisak leh pension tawh rawih nawn chu ṭha an ti lo a, an dodal zel dawn thu leh titawp tura Chief Minister an ngen thu a tarlang a; Chief Minister-in a lo dawnsawn dan leh hmalak zui ngei a tum thu a lo hrilh avangin lawm-awm an tih thu an sawi.

MZP chuan, Mizoram Public Service Commision secretary Tamlal Lohar chu December 31, 2015-a pension tawh tur, March 31, 2016 thleng hun pawhseisak a nih hnuah, rawih nawn a dil leh avangin June 30, 2016 thleng rawih nawn tura tih a ni chu an duh loh thu an tarlang a, “MPSC secretary Tamlal Lohar rawih nawn lehna order hi sût nghal turin thuneitute kan ngen a ni,” an ti.