Lo hâl tlaite thubuai Titawp turin sorkar ngen

ZNP chuan thuchhuah siamin, Mizoram sorkarin lo hâl hun hnuhnung atana a ruat, March 15, 2016 hnua lo hâl vanga Mamit district-a mante chu an lainat thu an tarlang a, an thubuaite chu titawp turin sorkar an ngen.

ZNP chuan, lo hâl hun tawp hmaa hâl thei lo eng emaw zatte chu khaw awm danin a zir loh vang nia sawiin, "Mamit district-a sorkar thupek zâwm thei lo kut hnathawktute March 15, 2016-a police-te'n man a, Mamit PS-ah thubuai ziah luh a ni hi mak kan ti a, thubuai neite kan lainat hle a ni," an ti.

Sik leh sá inthlak dang-lam vangin hriat lâwk loh khuarêl thil a thleng ṭhin tih sawiin, ZNP chuan, "Hetiang harsatna hi a khát tâwka kan tawh ṭhin a nih avangin climate change chungchangah sorkarin policy mumal tak a neih a ngai tawh hle," an ti a; ZNP a sorkar hun chuan khuarêl chhiatna tâwkte chhawmdawlna tur 'Climate Change Resilient Programme' an kalpui tur thu an sawi bawk.