Mizoram Secretariat Annex-I building-a ICT leh HTE office-a bungruate a kâng

Thawhṭanni zan dar 7 vel khan Raj Bhavan bula Mizoram Secretariat Annexe-I building-a Information & Communication Technology (ICT) leh Higher & Technical Education (HTE) department room luahte a kâng a, bungrua cheng nuai 103 hû vel a kâng rala chhût a ni.

Kângmei hi ICT department awmna hnuaia Mizoram State e-Govenance Society-te bungrua dahkhawmna aṭanga chhuak nia hriat a ni a; computer leh a kaihhnawih bungrua eng emaw zat bakah, HTE department file pawimawh eng emaw zat a kâng chhia. ICT department bungrua kâng chhiate zingah laptop 40, scanner 100, printer 111, UPS 90 leh UPS battery 120 a tel.

Kângmei chhuah thu Fire & Emergency Service department hnenah zan dar 7:25-ah hriattir a ni a, kâng ṭhelh motor tirh nghal niin, office dang a kan kai hmain ṭhelh theih a ni a, zan dar 10 velah ṭhelh mit a ni.

Kângmei chhuahna hmunah hian HTE minister R Romawia, ICT secretary Lalhmachhuan-a, Aizawl DC Kannan Gopinathan, Aizawl SP Lalhuliana leh Fire & Emergency Service SP Lalṭhafamkima Jongte te an kal nghal.

ICT minister Lal Thanzara pawhin kângmei chhuahna hmun hi nimin zing khan a tlawh a, thawktute'n bungraw kâng chhiate leh a seng fel dan tur an enfiah a ni.