Oil palm chìn dan tur sawiho

Mizoram Oil Palm Advisory Committee chu nimin khan parliamentary secretary (Agriculture) Lt.Col. ZS Zuala hoin Agriculture directorate committee room-ah an
ṭhukhawm a; oil palm chu a theihna hmun apianga zau khat, ram inpawh tlanga chìn a nih theihna tura district hrang hranga Agriculture officer-te rua-hmannate an thlirho.

Oil palm chìn kawng-ah hian Mizoram sorkar chuan company pathum - Godrej Agrovet Ltd., Ruchi Soya Industries Ltd. leh 3F Oil Palm Agrotech Pvt Ltd. te a thawhpui a; anni nen hian MoU hnuaia thawhho a ni.

Godrej Agrovet hian Kolasib leh Mamit district enkawlin, ram hectare 11,590-a zauah hmalak a ni a, oil palm rah metric ton 8,896 thar chhuah ni tawhin, Bukvanneiah Oil Palm Mill din tawh a ni. Ruchi Soya Industries-in Lunglei leh Lawngtlai district enkawlin, ram hectare 8,818-a zauah metric ton 220.024 thar chhuah a ni tawh a; 3F Oil Palm Agrotech chuan Aizawl, Serchhip leh Saiha district enkawlin, ram hectare 2,950-a zau aṭangin metric ton 29.562 thar chhuah a ni tawh bawk.