CoMACi-in Aizawl khawpui chhunga Tui lâkna pipe phûm dan tur sawiho

Coordination Committee on Management for Aizawl City (CoMACi) chu an chairman Vanlalngaihsaka, Aizawl DC hoin nimin khan a pisaah an ṭhukhawm a; SIPMIU-in Aizawl hmun ṭhenkhata tui lâkna tur pipe line an phûm dan tur leh thil pawimawh hrang hrang an sawiho.

CoMACi Chairman chuan, Aizawl Municipal area huam chhunga hna chi hrang hrang thawktu sorkar department leh private company-te'n hna an thawh tur, a bikin kawngpui khawih tel leh mipui tana harsatna thlen thei thil a nih chuan, hna an thawh ṭan hmain, sorkar thuchhuak angin CoMaCi hnenah an hriattir ngei tur a ni," a ti.

CoMACi Chairman sawi danin, Mizoram sorkara work department-te'n mipui leh ram hmasawn nana an hnathawh hrang hrangte insubuai loa mipui tana harsatna siam lo thei ang bera kawng siam leh kawng laih te, pipe phûm, kawng block, etc. leh thil dangte inrawn tlang chunga thawhho dan tur ngaihtuah tura CoMACi din a ni.

SIPMIU programme director Lalrothanga chuan, SIPMIU-in Aizawl khawpui châwm tur tui lâkna an buaipui mek chung­changah CoMACi hnena an thu thlen a sawifiah.

Lalrothanga sawi danin, SIPMIU hmalak mekna 'Augmentation of Aizawl Water Supply and Construction of 37-MLD Water Treatment Plant, Phase-3 chu ni tin tui litre nuai 370 pe thei tur a ni. Tlawng lui, Setlak lui chhuah aṭanga Laipuitlanga tuizêm lian thleng turin pipe phûm mek a ni a, km. 11.5 phum zawh tawh niin, hmabak km. 2.6 a la awm.

CoMACi hi Mizoram sor­karin September 6, 2019-ah notification chhuahin a din a, Aizawl Municipal area chhunga sorkar emaw, sorkar ni lo eng agency pawhin hmasawnna hna an thawh tur chungchangah thuneihna sang tak pek a ni a; hna thawh ṭan hun tur, thawh lai tihtawp leh chhunzawmtir chung­changah thuneihna an nei a ni.