Tun hnaia ruahsur, thlipui leh rial tla vangin in 2,311 a chhia, mi pakhat a thi

Kumin March 31 aṭanga April 2 chhunga ruahsur, thlipui tleh leh rial tla vangin Mizoram hmun hrang hrangah chenna in 2,311 a chhia a, mi pakhat a thi.

Disaster Management & Rehabilation (DMR) department chhinchhiah danin, ruahsur, thlipui tleh leh rial tla vanga chenna in chhia 2,311 zinga 335 chu luah zui tlak lohin a chhe vek a, 1,976 chu a chhe vek lo thung.

Tun hnaia khuarel chhiatna thlengah hian mi pakhat a thi a, mi panga an hliam. Mitthi leh leh hliamte chu Aizawl district-a mite an ni.

Chhiatna thleng vang hian DMR minister K Sapdanga hoin April 1, 2024 khan a pisaah emergency meeting neih a nih thu sawiin DMR department hotute chuan, "Chhiatna thleng chungchanga hmalak dan tur leh chhawmdawlna chungchang ngaihtuah a ni. April 3 khan Chief Secretary hoin a kaihhnawih department hrang hrangte nen hmalak dan tur ngaihtuah leh a ni bawk," an ti.

DMR department tarlan danin, sorkar hotute leh department kaihhnawih hotute hmalaknain chhiatna tuarte chhawmdawlna atan State Disaster Respinse Fund (SDRF) aṭangin rîkrum thila rângvâ leh tarpauline lei nghal tura tih a nih angin rang taka order siama lei nghal a ni. Rângvâ eng emaw zat a thleng tawh a, Aizawl district tan April 4 khan allotment an siam. Rangva leh tarpauline dangte pawh thleng thuai tura beisei a ni.

SDRF sum pawh dil belh nghal a ni a, rang takin sorkar leh department hotute'n bawhzui niin April 4 khan Finance department aṭangin an hmu nghal.

Khuarel chhiatna tuarte SDRF aṭanga chhawmdawlna sum pek tur chu district ṭhenkhatah chuan pek chhuah tawh a ni a, pek mek zel a ni bawk. Ṭanpuina chu chhiatna tâwkte bank account-ah thun a ni.