Ni 100 chhunga thawh tura kan ruahmante kan thawk zo thei - CM Lalduhoma

Chief minister leh ZPM leader Lalduhoma chuan nimin khan Serchhip New Venglai YMA Hall-a ZPM Serchhip Block Political Training-ah thu sawiin, a kaihhruai sorkarin ni 100 chhunga thawh tura an ruahmante ṭha takin an thawk zo thei niin a sawi.

Lalduhoma chuan, an sorkar hma aṭangin rorelna an chan huna an kal dan tur ruahmana fel tak an siam tih sawiin, "Chu ruahmanna ang chuan vawiin thlengin kan la kal. Ni 100 chhunga thawh tur kan ruahmante pawh Pathian hruainain ṭha takin kan zo fel thei a, hengte hi kan ṭhat bik vang leh fel bik vang ni loin, thil ṭha lo nia langte kan ti lo a, thil ṭha nia kan hriatte chu kan tih ṭhin vang a ni," a ti.

ZPM party chu ruling party ni tawh zingah an danglam bik hle nia a lan thu sawiin Lalduhoma chuan, "A ṭha zawnga Mizoramah social reform thlentu a ni mek leh puipunna leh party thil tihkhawmnaah zu leh ruih theih thil ngaisang lotu kan ni hi a lawmawm. Mizoram politics-ah Pathian ram a thleng chho mek a ni," a ti a; ZPM a sorkar veleh Mizoram mipui lawmin an au a, mipui an tibeidawng thiang lo tih a sawi.

Lalduhoma chuan, Serchhip bial mipui chungah lawmthu sawiin, "MLA by-election aṭang tawha Mizoram tan example ṭha tak siamtu in ni hi ka chhuang em em che u," a ti a; Lok Sabha inthlan awm turah pawh ZPM candidate Richard Vanlalhmangaiha vote tling ngei turin a sáwm a ni.

Chief Minister chuan, tun hnaiah Mizoram hmun hrang hrangah thlipui, ruah leh rial thawk vanga chhiatna thleng chu pawi a tih thu a sawi a, "Tun hmain khuarel chhiatna vanga in leh lo leh thil dang, chhiatna tuartute'n chhawmdawlna rei tak tak an nghah ṭhin chu ZPM sorkar hnuaiah chuan a hun takah pek an ni ta a, hei hi kalphung thar leh thil lawmawm tak a ni," a ti.