Council of Churches in Mizoram October 2024-ah din fel tum a ni

Mizorama kohhran pawl hrang hrang aiawhte chuan October 2024-ah chuan kohhran hrang hrang intel khawmna tura duan, Council of Churches in Mizoram chu a nih dan tur anga din tawh an rûl.

Council of Churches in Mizoram (CCM) Joint Committee member-te chu April 3, 2024 khan Synod Office-a JM Lloyd Hall-ah an ṭhukhawm a, Synod moderator Rev. R Vanlalnghaka'n kaihruaiin, kohhran pawl paruk aiawh mi 37 an tel.

Ṭhutkhawmah hian, CCM Constitution buatsaih chungchang leh CCM din a nih theihna tura Implementing Committee din chungchang an ngaihtuah. CCM chu October 2024-ah chuan a nih dan tur angin ding fel hman tawh se la, an ti a; programme ṭul ang leh constitution chungchanga rel fel ngaite bawhzui turin Drafting Committee kutah an dah.

Ruahman dan chuan, Drafting Committee hi April 29, 2024 khian Lungleiah an ṭhu dawn a, an ruahmannate chu June 11, 2024-ah Joint Committee-in an thlir leh ang.

Thu dawn danin, Mizorama kohhrante inpumkhatna tur hian missionary din kohhran pathumte'n bul an ṭan a, kohhran dangte sawm belh an ni bawk a; tunah hian CCM dinna tura kohhran tel mekte chu - Mizoram Presbyterian Kohhran, Mizoram Baptist Kohhran, Evangelical Church of Maraland, Lairam Isua Krista Baptist kohhran, Evangelical Free Church of India, Isua Krista Kohhran (Bualpui Ng) leh Salvation Army an ni.

Council of Churches in Mizoram din leh a kalphung tur duante chu kohhran pawl parukte hian an inkhawmpui ṭheuhah an pawm tawh hlawm a ni.