Thu dik loa mipui bum tumah MNF-in CM Lalduhoma an puh

MNF party chuan thuchhuah siamin, chief minister Lalduhoma chu langsar taka thu duik lo hmanga mipui bum tumah an puh a, an dem thu an tarlang.

MNF chuan, "ZPM-in Lok Sabha inthlan tura campaign kickoff an neih ṭuma CM Pu Lalduhoma'n 'MNF MP-te chu NDA Parliamentary Whip-in a thunun avanga mahni duhnaa vote thlak thei lo' anga a sawi kha amah ngei pawhin thu dik lo a ni tih a hriat chian sa, langsar taka dâwt hmanga mipui bum tumna a ni a, CM meuh tih atan chuan hniam kan tiin thil zahthlak takah kan ngai," an ti.

Lalduhoma thusawi chu politics khelh dan ṭha lo ber chi a nia sawiin MNF chuan, "Hre reng chunga mipui bum tumna a ni. MNF MP-te hi MNF party ticket-a thlan tlin an nih avangin eng whip mahin a thunun lo," an ti a; NDA kalha vote an thlak avangin disqualify (bàn) theih an nih loh thu an sawi.

MNF party chuan, tun hnaia Biren Singh kaihhruai, Manipur BJP sorkar hnuaia Kristiante biak-in tam tak hâl a nih avanga Parliament-a eptute'n sorkar laipui paihthlakna tur motion an put luh pawh Mizoram MP pahnih K Vanlalvena leh C Lalrosanga ten lansar taka an thlâwp thu an sawi a, "Kan ram, kan hnam leh kan sakhaw humhimna turin nasa takin an ṭang tih Mizoram mai ni lo, India mipuite'n an hria," an ti.