KHAWTHLIR

Synod-in tanpui

Mizoram Synod chuan tun hnaia thlipui leh rialin in eng emaw zat a tihchhiatna khua - Zohmun leh Palsang khuate hnenah April 4, Ningani khan ṭanpuina Rs 36,50,000 an pe. Ṭanpuina pe tur hian Synod senior executive secretary Rev. C Zorammawia leh thawktu mi pathum an kal a, kohhran tih bik awm loin ṭanpuina an hlan a ni.

Observer-in tlawh

Lok Sabha inthlan lo awm tura Mizoram tana general observer Dr Nipun Vinayak, IAS chuan nimin khan Zokhawthar a tlawh. Khawtlang hruaitute a kawmnaah, inthlanna tibahlah leh nghawng thei thilte do kawngah thuneitute ṭha taka thawhpui zel turin a chah.

AR-in heroin man

Assam Rifles sipaite chuan April 4, Ningani khan Melbuk huam chhung kawngpuiah heroin no. 4 gram 69 an man a, a neitu man nghal bawkin, Zokhawthar police hnenah an hlân. Heroin an man hi Rs 48,30,000 hu a ni.

MBSE leh MISA

MBSE hotute leh Mizoram Independent School Association hruaitute chu nimin khan MBSE pisaah an inkâwm a, MBSE chairman JH Zoremthanga'n a kaihruai. Zawhna changkang zawk hman a ṭul thu te, exam zawhna felfai leh changtlung zawka siam a ngaih thu te, exam paper endik leh result siamah tihsual palh a awm lohna tura invenna chungchang leh thil dangte an sawiho.

Kuhva chíngtute'n Minister kâwm

Mizoram Arecanut Growers Association hruaitute chuan nimin khan Land Resources, Soil and Water Conservation minister Lalthansanga an hmu a, kuhva chíngtute harsatna tawh ṭhin te, thawhhona ṭha zawk neih dan tur leh an kal zel dan turte an sawipui.

EYMA Tuisik

YMA, Electric Veng Branch, Aizawlin an YMA Hall hnuai kawngpui àna tui tihthianghlimna leh tihvawhna (water cooler) EYMA Tuisik an dah thar chu nimin zing khan an president hlui Lianchungnunga'n a hawng.