AMCRA-in TBC-a báng turin an phût ; MLA TBC-a'n dan anga hmalak a tum

All Mizoram Car Rental Association (AMCRA) hruaitute April 4, Ningania Hotel Regency-ah ṭhukhawm chuan, Lok Sabha inthlan tura election official-te tana rental car hman chungchang avangin MLA TBC Lalvenchhunga bâng turin an phût. Hetih lai hian, TBC Lalvenchhunga chuan, dik lo taka puh a nih avangin dan hmanga hma a la dawn thu a tarlang.

AMCRA chuan resolution siamin, election official-te tana rental car hman chungchangah tun hmain thil fel lo a la awm ngai lo niin an tarlang a, "Tun ṭuma buaina kan tâwk hi a pawi kan ti tak zet a, a rang thei ang bera chinfel nise kan duh," an ti.

Tun ṭum Lok Sabha inthlana election official duty-te tana car hmang turin AMCRA kaltlangin hman (demand) a ni lo tih sawiin AMCRA chuan, "AMCRA member ni duh lo TBC Car Rental-te chauh koh an ni hi kan hrethiam thei lo. TBC Car Rental neitu Pu TBC Lalṭhatluanga hian a unaupa adviser to CM Pu TBC Lalvenchhunga thuneihna dik lo takin ama mimal hamṭhat nana a hmang ṭangkai duh hi pawi kan ti," an ti a, tihtawp thuai an phût.

AMCRA chuan, MLA TBC Lalvenchhunga chu a vua leh vângte vulhna atana a thuneihna dik lo taka hmang sual an puh a, "ZPM sorkar hnuaiah MLA ni tlakah kan ngai lo a, ZPM sorkar hian a ministry timualphotu TBC Lalvenchhunga hi bàn a nih theih nan chak takin hma la nghal rawh se," an ti.

Hetih lai hian adviser to CM TBC Lalvenchhunga chuan nimin tlai khan a official letterhead hmangin statement a tichhuak a, "AMCRA-in MP (Lok Sabha) inthlana election official duty-te tana car rental hman a nih chungchangah thuneihna dik lo taka hmang leh mimal hamṭhatna atana hmang anga min puhna hi ngawihbopui chi niin ka hre lo a... Dik lo taka inpuhna leh intihhmingchhiatna chungchangah hian dan hmanga hmalak a ni ang. Tun hnuah hetiang thil hi tu chungah mah thleng tawh lo se ka ti," a ti.

AMCRA chuan, rental car hman chungchangah SCERT Deputy Director pakhat a inrawlh nia an hriat thu sawiin, "Thuneihna hman sual hreh lo sorkar hnathawk hi sorkar tichhetu a nih avangin sorkar hnathawk tlak niin kan hre lo a, a hna aṭang hian bàn ni rawh se," an ti a; MP inthlan atan TBC Car Rental vek hman chu tihtawp a, AMCRA kaltlangin hman an phut thu an tarlang bawk.