Vairengte - Mualkhang kawng sawiho

Kolasib bawrhsap John LT Sanga hoin nimin khan DC conference hall-ah Kolasib SP, Additional DC, PWD Executive Engineer, NHIDCL Project Manager, Kolasib Drivers & Welfare Joint Action Committee hruaitute leh contractor-te'n Vairengte leh Mualkhang inkar kawng thawm ṭhat thuai dan tur an sawiho.

Kolasib Bawrhsap chuan, Kolasib paltlang NH chu Mizoram mipui châwmtu kawngpui pawimawh a nih avangin enkawl ṭhat a nih loh a, a chhiat chuan Mizoram mipui tan harsatna a thlen theih thu a sawi a, "Hnathawh theihna hun ṭha a awm lai hian inthlahdah loa chak tak a hmalak zung zung a ṭul," a ti a; contractor-te hna thawh uluk taka vil a nih dawn thu a sawi.

Ṭhutkhawmnaah hian Addl. DC hoa Kolasib Drivers & Welfare Joint Action Committee-ten kawng chhia an endiknaa an hmuh dan leh hmalakna kalpui dan turte sawi a ni a; contractor-te chu hna hmabak an neih ṭheuhte an thawh ṭan theih hun tur leh an thawh zawh hun tur chiang taka sawi tur a tih an ni.

Sâwt zawka hna kalpui turin sorkar leh khawtlang ṭan rual a pawimawh thu sawi a ni a, hmaraw ṭha chauh hman a nih theih nan uluk takin hna vil a nih tur thu sawi a ni bawk.