Mizoram sorkar tichak turin khalh ngil hna ka thawk dawn - PC Candidate

Peoples Conference party Lok Sabha MP candidate Rita Lalmalsawmi chuan nimin khan an party pisaah thu sawiin, MP atan thlan tlin a nih chuan sorkar ṭha a awm theih nan, Mizoram sorkar tichak turin khalh ngil hna a thawh dawn thu a sawi.

Rita Lalmalsawmi chuan, MP nihna leh dinhmun pawimawhzia te, sorkar khalh ngil tura hna an thawh theihziate mipuiin an la hre tawk loa a ngaih thu sawiin, "MP-te hi central sum endiktu District Vigilance and Monitoring Committee-ah chairman an ni a, hei vang hian MP ka nih chuan central aṭanga sum lo kalte enfiahtu ka ni dawn a, sorkar hi ka khalh ngil thei dawn a ni," a ti.