Ballygunge-a Mizoram House hmun sorkarin a hralh tawh sûtna High Court-in a sût ve leh

Mizoram sorkarin Ballygunge, Kolkata-a Mizoram House hmun/ram a hralh tawh chu Mizoram sorkar vêkin a sût a; Mizoram sorkar thu chu Calcutta High Court chuan April 2, 2024 khan a sut ve leh. Ram chungchangah hian ram leitu Excel Vincom Pvt Ltd-in Mizoram sorkar a khing a ni.

Ballygunge-a Mizoram House hmun hi MNF party kaihhruai Mizoram sorkar chuan kum 2023 khan Excel Vincom Pvt Ltd hnenah a hralh a, a man pawh Mizoram sorkarin a dawng tawh. Mahse, ram hralh danah tyhil fel tawk lo leh mimal hamṭhatna tur thil a awm nia ngaiin ZPM sorkar a pian hnuah mipui tam zawk duh dan angin kumin 2024 khan Mizoram House hmun hralh tawh chu sût a ni.

The Times of India-in a tarlan danin, Justice Sabyasachi Bhattacharyya, Calcutta High Court chuan Mizoram sorkar, ZPM kaihhruai thutlukna chu sûtin, "State sorkar nihphung hi a nghet a, sorkar inthlak danglam avang leh politics thil vanga nawrna a awm avangin thutlukna siam tawh thlak danglam tur a ni lo," a ti.

High Court chuan, tute emaw politics taka nawrna avanga thutlukna sorkarin a siam tawh chu sorkar tharin a sût tur a nih loh thu te, ram hralh leh lei chu inthlan hma lama thil thleng tawh a nih thute tarlan a ni a; "Mimal thila inremna satliah a ni lo a, sorkarin mipui hriat theih turin tender hmangin a puangzar a, chumi titu chu Mizoram state sorkar a ni," a ti bawk.

High Court-ah hian Mizoramin Mizoram House a mamawh belh thu te, Ballygunge-ah hian in chhâwng li (ground floor + 3) sak tum a nih thu leh Kolkata Municipal Corporation pawhin phalna a pek tawh thu te, damlo na zualte thlenna tura ruahman a nih thu te, Ballygunge-a ram hralh chu Calcutta Mizo Welfare Association leh Kolkata Mizo Students' pawhin an dodal thute Mizoram sorkar ukilte'n an sawi tih tarlan a ni. Mahse, High Court chuan, "E-tender hmanga hralhna tihfel diam tawh sût leh hi thil kalphung a ni lo," a ti thung.

Ballygunge Mizoram House hmun hralh tawh sût a nih thu hi chief minister Lalduhoma chuan, January 6, 2024-a press conference a neihah a puang a, ram hralhna sum vbc. 38 pawh pêk kìr a nih thu a sawi a, "Kolkata Mizoram House-a thawkte leh Mizo zawng zawng khuan an ui tlawk tlawk a ni," a ti.

CHIEF MINISTER SAWI DANGTE

◆ A tira sorkar hotute rilruah Ballygunge-a Mizoram sorkar ram hralh a, a manin Salt Lake/New Town lamah hmun dang lei a, in ṭha zawk sak tum a ni. Mahse, kha lam pang bawhzuina rêng rêng a awm ta si lo. A hralh ringawtah khan thuneitu sang aṭangin hmanhmawh deuha nawrna a awm a ni.

◆ Ballygunge-a Mizoram sorkar ram hralh chungchangah sell deed a la awm lo, a neitu thar hminga dah a la ni lo. Agreement ka'n en khan clause hnih lai cancel leh theihna sorkarin thuneihna kan lo nei a, legal opinion kan la a, chu'ng hmang chuan kan cancel ta a ni.

◆ Ballygunge-ah Mizoram House sak thar tum a ni a, G+3 (chhâwng/floor 4) sak an phal a, a bulahte pawh in sang tak tak a awm. West Bengal sorkara Housing Minister, Kolkata Mayor ni bawk hnenah chhâwng hnih dang sak belh kan dil dawn.