Ni 100 chhunga tihhlawhtlin tura hlawhchhamah MNF GS-in ZPM a puh
MNF general secretary VL Kroshnehzova chuan April 6, Inrinni khan Aizawl Press Club-ah thuthar thehdarhtute a kâwm a; ZPM sorkar chu ni 100 chhunga tihhlawhtlin tura an tihah a hlawhchham nia sawiin, kut hnathawktute an tibeidawng niin a sawi.
VL Krosshnehzova chuan, ZPM kaihhruai sorkar chu ṭha ber nia insawiah leh chumi vanga mipui rilru hmina sorkarna changah puhin, "Mipui hnena an inzawrhna hrang hrangte zingah mipui thlai thar leisak chungchang an sawi chàmchí chu a tak ram vawiin thlengin hmuh tur a la awm lo a, kut hnathawktu beiseina sang tak nena thlirtute an tibeidawng nasa," a ti.
ZPM sorkarin ni 100 chhunga an hmalakna turte an sawi fo a, Asembly budget session hmasa berah Governor an sawitir a, Republic Day 2024-ah pawh Governor an sawitir nawn leh tih sawiin Krosshnehzova chuan, "Chief minister Lalduhoma chuan thlai thar leina tur crore 110 dah a nih thu a sawi," a ti a; mahse, thlai thar an lei thâwm hriat tur a awm lo niin a sawi.
MNF General Secretary chuan sorkarin hmunphiah chu a leisak tih sawiin, Vairengte chhehvelah kum tin quintal 30,000 vel an thar ṭhin a, a hringin kg. khat Rs 50-62-in an hralh ṭhin niin a sawi a; "Kuminah ni hnih vel an hralh hman tihah sorkar hmalak tumna avangin thil a kal buai zo a, a rate tlahniamin, a sengnaa an senso ṭhin kg-a Rs 25 aia sangin a hralh theih lo... An hloh hi qtl 30,000 vel thar tura chhûtin Rs 11,10,00,000 a tling," a ti.
VL Krosshnehzova chuan, "Kut hnathawktute'n sawhthing tam tak an thar laiin, thlár khat lek pawh ZPM sorkar hian an lei thu hriat tur a la awm lo," a ti a; hmarcha leh aieng pawh thar a awm laiin an lei thu hriat tur a la awm lo a niin a sawi.
ZPM sorkarin beisei a pha lo hle nia sawiin MNF GS chuan, "Thlai thar lei tura ni 100 programme-a an sawi leh a taka an hnathawh hi mark pe dawn ila, pek tur a awm lo. Kut hnathawktute thlai thar leisak tura intiam siin, an mittui titlatuah an ṭang ta zawk hi a pawi kan ti a, kut hnathawktute a tawrhpui tak zet a ni," a ti.