Observer hoin Lungleiah ṭhukhawm

Lunglei district election officer Ramdinliani hoin April 6, Inrinni khan DC conference hall-ah Lok Sabha inthlan awm tura police observer K Satyanarayan, expenditure observer Anita Rinesh leh sorkar hotute an ṭhukhawm. Observer pahnihte chuan inthlanpui atana Lunglei district inpuahchahna chu ropui an tih thu an sawi.

Ṭhutkhawmah hian Lunglei SP J Lalmuankima chuan, boruak muanawm tak hnuaia Lok Sabha inthlanpui neih a nih theihna tura police-te inpuahchah dan, hmalak tawhna, hmalak mekna leh hmachhawpte a tarlang a; expenditure monitoring nodal officer Donny Lalruatsanga'n election expenditure kaihhnawih thil an vil dan leh an hmalak dante a sawi.

Election observer pahnihte chuan, Lok Sabha inthlan atana Lunglei district inpuahchahna chu ropui an tih thu sawiin, DEO leh election official-te thawhrimna leh inpekna lawmawm an tih thu an sawi.

Police observer K Satyanarayan chuan, Mizoramin boruak muanawm tak hnuaia inthlan an kalpui dan chu India ram state dangte tana entawn tlak, model tling nia a hriat thu a sawi a, "Model Code of Conduct zawm ṭhatte pawh in pianpui thil ang mai a ni," a ti.

Mizoramin inthlan a hmachhawn dan te, inthlanpui atana a inpuahchah dan te, inthlanna muanawm leh felfai a awm theihna tura mipui, tlawmngai pawl, kohhran leh MPF-te'n pheikhai rual taka hma an lak dante chu India ram pum bakah, khawvelah puanzar tlak a nih thu Satyanarayan chuan a sawi bawk.

Observer-te pahnih hian Saikuti Hall-a EVM strong room leh hmun pakhata polling station pali awmna Chanmari High School an tlawh nghal a ni.

LUNGLEI DISTRICT DINHMUN
- Assembly segment paruk leh polling station 176 a awm.

- Polling station 24 chu hmeichhe hlangin an vil dawn.

- Model polling station 12 a awm.

- Voter 500 aia tlem awmna polling station 79 a awm a, chu'ngte chu polling official pathumin an vil dawn.

- Polling station hla ber - Marpara PS (km. 121)