Central-ah thlàwp bik kan nei dawn lo - ZPM Candidate

Lok Sabha inthlan tura ZPM candidate Richard Vanlalhmangaiha chuan, MP-ah a tlin chuan sorkar laipuiah thlàwp bik a neih dawn loh thu leh, Zokhawthar chu India ram hmun pawimawh a nih avangin ramria insumdawn tawnna mumal zawk leh hlâwk zawk nei turin hma a lak dawn thu a sawi.

Richard Vanlalhmangaiha chuan April 6, Inrinni khan Zokhawthar MPF Local Forum kaihhruaia Zokhawthara street campaign-ah thu sawiin, "Zokhawthar hi Mizoram hmun pawimawh mai a ni lo a, India ram hmun pawimawh a nih avangin border trade mumal zawk leh hlâwk zawk nei turin hma ka la dawn a ni," a ti.

ZPM Candidate chuan, "Ka hna pawimawh tur chu state sorkarin project tam tak central sorkarah a thehlut dawn a, chutiang lo bawhzuitu tur chu ka ni," a ti a; Zokhawthar chu Mizoram kawtchhuah a nih avangin tourism lama tihchangtlun a ngaih pawimawh dawn thu a sawi.

Richard Vanlalhmangaiha chuan, MP-ah thlan tlin a niha a awm dan tur sawiin, "ZPM min thlang tling a nih chuan central sorkarah thlàwp bik kan nei dawn lo a, independent kan ni ang. Kan ram kan hnam dinchhuahna tur leh ṭhatna tur ang zelin issue base-in kan kal dawn. Development a tam thei ang ber Mizorama hnuh luh kan tum kawngah central-ah eng party pawh sorkar se harsatna a awm dawn lo," a ti.

Mizoram khaw tam takah MP fund a awm a ni tih hre lo an la tam hle nia sawiin Richard-a chuan, "Min thlang tling a nih chuan rualkhai leh daihzai thei ang bera hman ka tum dawn a ni," a ti a; Zokhawthar chu ruihhlo tawlh rûk kalkawng nia a lan avangin a khaw mipui duh dan ang ngeiin chak leh khawng zawka hmalak a tum thu a sawi.

ZPM party chuan April 6 vek khan Champhai Vengthlangah street campaign an buatsaih a; Richard Vanlalhmangaiha chuan, "Thlan tlin ka nih chuan Champhai bial mipuite'n in thlan tlin MLA-te thâ tichak turin hma ka la dawn," a ti.

Lalnghinglova Hmar, minister of state pawhin thu sawiin, ZPM chuan central-ah zawmpui a nei lo tih sawiin, "ZPM MP a ni tawp dawn a, NDA emaw INDIA emaw kan zawm dawn lo a, issue base-in a thu azir zel leh Mizoram mipui duh danin kan kal thei dawn bik," a ti a; ZPM MP chu tu thuhnuaiah mah a awm dawn loh thu a sawi. Street campaign-ah hian Champhai North bialtu MLA Ginzalala pawhin thu a sawi a ni.

ZPM Candidate hian April 5, 2024 zan khan Farkawn khuaah vantlang inkhawm a buatsaih bawk a; amah bakah, minister Lalnghinglova Hmar, MLA Jeje Lalpekhlua leh AMC corporator Christina Roluahpuii Sailo ten thu an sawi.