Hmasawnna atan BJP vote turin sáwm

Lok Sabha inthlan tura BJP candidate Vanlalhmuaka chuan, Mizoramin a mamawh ang hmasawnna a dawn theih nan amah vote turin Mizoram mipui a sáwm.

Vanlalhmuaka hian amah ṭawiawmtute nen Mizoram chhim lamah an campaign a; April 6, Inrinni khan Chawngte (Kamalanagar)-a vantlang inkhawmah thu sawiin, "Mizoram hi kan ṭhenawm state-te aiin hmasawnna lamah kan hnufual tawh hle. Kan ram, kan hnam leh kan sakhua humhim chungin kan mamawh ang hmasawnna kan dawn theih nan in vote hlu tak hmanga min vote ṭheuh turin ka sawm che u," a ti.

Mizoram BJP President chuan, Chawngteah campaign-in a kal fo tawh a, hmâna kawng a chhiat ang thoin tunah pawh a la chhe reng tih sawiin, "A mak hle. Mizoram chhung vek ni si hi ram hmangaihtu inti state sorkarin a ngaihthah ṭhin hi a pawi hle," a ti a; MP atan thlan tlin a nih chuan kum khat chhungin Chawngte kawng chhia chu an siamṭhat nghal dawn thu a sawi.

Lok Sabha inthlan tura BJP hmunpui aṭanga Mizoram viltu Devesh Kumar pawhin thu sawiin, "Central sorkar chuan India ram hi developed country-ah siam a tum mek a, chu hmasawnna chu Mizoram pawhin a chan ve ngei min duhpui hle," a ti a, India ramin hmasawnna a hmuh ruala Mizoramin a hmuh ve theih nan BJP MP candidate vote turin mipui a sáwm.

Devesh Kumar chuan, central-ah BJP an sorkar leh dawn avangin Mizoramin BJP MP an thlang tling a nih chuan union minister a nih dawn thu a sawi bawk.