BJP Foundation Day hmang

BJP, Mizoram Pradesh chuan April 6, Inrinni khan Aizawla an pisaah BJP din champha, BJP Foundation Day an hmang. Thu sawitu Dr K Beichhua, MLA chuan, kawng dik an zawh theih nan ngaihtuahna hmang turin an party mite leh Mizoram mipui a chah.

Dr K Beichhua chuan, BJP din champha kum 44-na pualin Mizoram mipui chibai a bûk tih sawiin, "Vawiina lo kalte leh Mizoram mipuite'n ngaihtuahna thar leh rilru thar kan neih a, hmasawnna kawng dik eng nge tia ngaihtuahna kan sên a, kawng dik kan zawh theihna turin ngaihtuahna i hmang ṭheuh ang u," a ti.

BJP chu Deendayal Upadhyay leh Dr Shyama Prasad Mukerjee ten uluk taka an din a ni tih sawiin K Beichhua chuan, "Kan mi hmasate azarah vawiinah BJP hi khawvela party lian ber kan ni mek. India ramah sorkarna term hnihna kan hmang zo ta a, hengah hian Pu Modi kaihhruaina hnuaiah India ram chuan achhivement ṭha tak kan hmu ta hi a ropui hle," a ti a; Mizoramah pawh party ṭhangduang tak an nih a beisei thu a sawi.