NDA-ah Kristian MP-te kan ṭhut luih tlat a ngai - K Vanlalvena

MNF party chuan April 6, Inrinni khan Aizawl chhung hmun hrang hrangah street campaign an huaihawt a, MNF candidate K Vanlalvena leh party hruaitu dangte'n thu an sawi. K Vanlalvena, National Democratic Alliance (NDA)-ah Kristian MP-te an ṭhut luih tlat a ngai niin a sawi.

Chanmari kâwna street campaign-ah K Vanlalvena chuan, MNF party chu political party 40 vel awm khawmna NDA-ah an awm mek tih sawiin, NDA-ah Kristian state MP eng maw zat kan tel. Kristian MP-te hi NDA aṭangin chhuak vek ila, Kristiante min nék chêp lehzual dawn. NDA-a Kristian MP kan lo awm tlat hi India ram pilril zawka Kristiante'n min thlamuanpui em em a ni," a ti.

K Vanlalvena chuan, "Hindu-in an nêkchêp mek Kristiante thlavâng hauh a, an tana ding tlat turin Kristian MP, a chhung aṭanga bei tur kan ṭhut luih tlat a ngai. Chu chu Kristian tan tun dinhmunah chuan a ṭha ber a ni," a ti a; Lok Sabha MP-ah a tlin chuan ram, hnam leh sakhaw him nan theihtawpa a beih zel dawn thu a sawi. (

MNF senior vice president Dr R Lalthangliana chuan, MP zinga 90% velin sorkar term khat chhungin Parliament-ah thu an sawi mang lo nia sawiin, Rajya Sabha MP K Vanlalvena erawh chuan kum 3 âwrh chhungin vawi 15 thu a sawi hman niin a sawi a, "Pu K Vanlalvena hi party ang záwnga en loin, Mizo mipui tan a ṭha thlâwt a ni. MNF theh chhuah ni mah se, Mizo mipui MP candidate a ni," a ti.

MNF vice president Lalchhandama Ralte pawhin thu sawiin, "MP candidate parukte an ṭha hlawm viau. Kan khin ber ZPM candidate tur hi mi ṭha tak a nih rualin, experience la nei lo a ni a, tun ang hun thing leh raw innawh nat vanglaia Kristian MP ni tur chuan a la tuai deuh em aw, a tih theih," a ti a; K Vanlalvena chu Paerliament-ah tawnhriat nei tawh a nih avangin vote turin mipui a sáwm.

Thu sawitu dang MNF treasurer Lalruatkima chuan, K Vanlalvena chu tun hmaa Mizote'n MP an hriat dan thlak danglamtu a nih thu a sawi a, "He ram, hnam leh sakhua himna tur leh kan chhehvela Zo hnahthlakte thlavâng hauh zel tur hian kan thlan tlin ngei a ṭul a ni," a ti.