KHAWTHLIR

Thisen pe

April 6, Inrinni khan KṬP, Sairang Pastor Bial-in Synod Hospital tan thisen unit 55 an pe a, petute mipa 50 leh hmeichhia panga an ni a; KṬP, Khatla South Branch pawhin ZMC tan thisen unit 21 pein, petute mipa 19 leh hmeichhia pahnih an ni. ṬKP, Bungtlang Bialin Serchhip District Hospital tan unit 40 an pe a, petute mipa 25 leh hmeichhia 15 an ni. PYD, Kolsaib Diakkawn Bial member mipa 12 leh hmeichhia pakuate'n Kolasib District Hospital tan unit 21 an pe bawk.

Kuhva phuh khap

Champhai district magistrate James Lalrinchhana chuan thupek chhuahin, Champhai district-ah Myanmar aṭanga dan loa kuhva lak luh leh phurh khap tlat a nih thu a puang. Thupek zâwm lote chu IPC Section 188 hmanga hrem theih an ni.

Observer-in PS endik

Lok Sabha inthlanpuia Mizorama expenditure observer Arvind Sharma chuan April 6, Inrinni zing khan Mamit khawpuia polling station panga a tlawh. Inthlanna thianghlim leh felfai a awm theih nan zu leh ruihhlo bakah, sum leh therhlo sem chungchang uluk taka vil turin AEO, BLO leh sikul enkawltu official-te a hrilh a ni.

Têkin déng hlum

Nimin khan Mithun Chakma (31) s/o Debo Kumar, Sakeilui-II, Lawngtlai district chu ṭêkin a déng hlum. Thu dawn danin, Mithun Chakma hi an ṭhenawmte ina chaw a ei laiin ṭêkin a déng a, ká chhawn loin a hmunah a thi nghal a, a nupui leh a fate pathum a kalsan a ni.

Sikul sak thar

Khawzawl Vengthara Model High School zauhna in sak thar chu Khawzawl bawrhsap K Lalrohlua'n April 5, 2024 khan a hawng. Sikul zauhna sak thar hi bialtu MLA ni lai W Chhuanawma leh bial MLA hmasa Tawnluia ten MLA fund an pek hmangin a dung ft. 40 leh a vang ft. 15-a sak a ni a, Rs 7,00,000 vel sên a ni. Model H/S, Khawzawl hi kum 1990-ah din a ni a, kum 2003-ah lumpsum-ah leh kum 2008-ah adhoc grant-in-aid ah dah a ni a, kum 2023 khan sorkarin a la (provincialise) a ni.