Larsapin naupang huaisente a lawmpui

Governor PS Sree­dharan Pillai chuan nimin khan Mizo naupang pathum, January thlaa Indian Council for Child Welfare (ICCW)-in huaisen chawimawina, Bravery Award a hlante chu Raj Bhavan-ah a kâwm a, chawimawina thuziak leh lawmpuina sum a hlan.

PS Sreedharan Pillai chuan, Mizo naupang huaisen pathumin ICCW Bravery Award an dawng thei chu lawmawm a tih thu sawiin, "Heng Mizo naupang huaisente hian Mizote chu tun hma aṭanga hnam huaisen, mahni inngaihtuah hmasa loa ṭanpui ngaite ṭanpui nghal ṭhin, ṭhian chhan thih ngam an ni tih a tilang chiang hle a ni," a ti a; Mizoram an tihhmingṭhat thu leh mi dangte tan entawn tur ropui tak an hnutchhiah thu a sawi.

Naupang pathumte chu - Lalliansanga (18) s/o F Lalruatfela, Phullen, Vanlalhriatrenga (14) s/o Lalhmunsanga, Sairang Dinthar leh Carolyn Malsawmtluangi (12) d/o Zoramthanmawia, Zuangtui-te an ni.